Plantun de Prouvènço

Pèr coumpara dos planto d'encò nostre

Glechoma hederacea & Plumbago europaea

Roundoto

Glechoma hederacea

Lamiaceae Labiaceae

Àutri noum : Chamecisso, Terreto, Courrejo-de-sant, Roundeto, Camecisso.

Noms en français : Lierre terrestre, Courroie de saint Jean.

Descripcioun :
La roundoto o chamecisso s'atrobo majamen dins li valado de nòsti mountagno qu'amo pas gaire lou relarg mieterran. Se recounèis à si fueio en cor quàsi roundo, si flour bluio pèr dos o tres.

Usanço :
Es uno planto di proun vertuouso qu'es emplegado desèmpièi li Grè e visto coume uno panacèio à l'age-mejan. Se counèis forço prouprieta e d'en proumié aquelo de faire pissa. Mai peréu d'ajuda à digeri e à toussi, de sarra li car, contro l'enflamacioun e peréu pèr li moureno. La poudès manja, mai èi recoumanda de n'en pas prendre de trop.

Port : Erbo
Taio : 10 à 30 cm
Fueio : óupousado
Tipe bioulougico : Emicriptoufite
Cicle bioulougico : Planto renadivo

Gènre : Glechoma
Famiho : Lamiaceae
Famiho classico : Labiaceae

Ordre : Lamiales

Coulour de la flour : Bluio
Petalo : irreguliero
Ø (o loungour) flour : 0,7 à 2 cm
Flourido : Printèms

Sòu : Ca
Autour basso e auto : 0 à 1600 m
Aparado : Noun
Mars à jun

Liò : Ermas - Ribiero - Baragno
Estànci : Subremediterran à Mountagnard
Couroulougi : Bourealo
Ref. sc. : Glechoma hederacea L., 1753

Erbo-di-rascas

Plumbago europaea

Plumbaginaceae

Àutri noum : Erbo-enrabiado, Bagoun, Erbo-de-la-rougno, Erbo-di-couquin, Malo-erbo.

Noms en français : Dentelaire, Malherbe.

Descripcioun :
L'erbo-di-racas, mens coumuno qu'à passa tèms, trachis en ribo de camin, i pèd de muraio e dins lis escoumbre ounte flouris amé de poulìdi flour vióuleto, à la fin de l'estiéu. Es uno planto eisado de recounèisse emé si flour e si fru pegous qu'arrapon li péu e li teissu.

Usanço :
Èi couneigudo au nostre pèr garris la rasco. Ramentèn qu'aquesto malautié de pèu e de péu s'aprèn à de champignoun coume Microsporum canis. Freta la bèsti emé d'òli de bagoun (adouba en fasèn bouli la planto dins l'òli). Se dis peréu qu'en mastegant la racino, apaisso li ràbi de dènt (erbo-enrabiado)-TdF. Pamens se n'en fau mesfissa que fretado sus la pèu pòu douna d'enflamacioun.